एमसीसी सम्झौतालाई नेपालमा धेरैले विरोध गरेको र थोरैले समर्थन गरिरहेको भन्दै उनले अमेरिकाको एउटा हेडक्वाटरमा तत्कालीन मन्त्री ज्ञानेन्द्र कार्कीले सम्झौता गर्दा संसदबाट अनुमोदन गर्ने कुरा नै नलेखिएको जिकिर मैनालीको छ । पछि अमेरिकाले संसदबाट पारित गर्न चिठ्ठी पठाएपछि नेपालका नेताहरू त्यसको दुष्परिणामको हेक्का नराखी संसदबाट पारित गर्न तयार भएको उनले बताए ।
‘पुरानो नजिर नहेरी यसलाई सदनबाट पारित गरेमा के हुन्छ’ उनले प्रश्न गर्दै भने, ‘कुनै पनि काम गर्न परेमा नेपाललाई नसोधी एमसीएले सिधै हेडक्वाटरसँग सल्लाह गर्छ । अमेरिकाको यो परियोजनाका ठेकेदारहरू डोनरले भने अनुसार हिँड्छन् । परियोजना निर्माण गर्दा ल्याउने ठूला–ठूला ट्यांकरहरूलाई नेपालले जाँच्न नपाउने हुँदा कन्टेनरमा के हुन्छ त्यसमा शंका छ । अमेरिकाले हाम्रो कामदार हो भनेपछि नेपालले कामदारलाई आवासीय भिषा दिन पर्ने र उनीहरूलाई १४ वटा कर पनि छूट दिनुपर्छ । त्यसरी कन्टेनर हुँदै अमेरिकाबाट हतियार, कमाण्डरहरू नेपालमा भित्रने सम्भावना अधिक हुन्छ ।’
अनुदान पाउने कुरा राम्रो भएपनि अमेरिकाको ठुलो स्वार्थ रहेको उनको भनाइ थियो । सडक तथा बिद्युतको आयोजना सकिएपछि संरचना कसलाई जिम्मा दिने कुरा सम्झौतामा उल्लेख नगरिएको उनले बताए । अमेरिकाले बनाएका संरचनाहरू अमेरिकाको हितबाहिर प्रयोग गर्न नपाइने पनि उल्लेख भएको उनले बताएका छन् ।
‘एमसीसीले कुनै पनि योजना र कसैसँग अर्को सम्झौता गरेमा नेपालले पनि त्यसलाई मान्न पर्छ । हात्तिका देखाउने दाँत जस्तै अमेरिकाले नाटक गरिरहेको छ ।’ अमेरिकाले शत्रु देश चीनलाई अप्ठ्यारो पार्न खोजेको उनले आरोप लगाए ।